Solicítase que non se tale unha árbore centenaria
O carballo en cuestión (Quercus robur) é un exemplar centenario, o único dunha carballeira que había no lugar e que se cortaron días atrás. No lugar preténdense construír varios chalés, continuando coa política de parcelacións que está a inundar o rural ponteareán de vivendas unifamiliares en parcelas minúsculas.
Xa non queda ningún lugar libre da ansia dos promotores. Mentres o PXOM non se aprobe vale todo. As árbores que nos viron medrar xa non importan. O que vale son os cartos fáciles, agora, antes de que o Plan Xeral queira pór orde”, indicou Anxo F. Saborido.
Os veciños do lugar recolleron sinaturas para que non se corte a árbore, que está no linde cun camiño público, polo que quedaría fóra dos terreos do propietario cando se realice o retranqueo legal esixido se se chega a construír.
Adenco solicitou a intervención do Concello e do Distrito Forestal do Condado para que analicen se se contaba cos permisos precisos antes de talar os carballos do lugar e que mentres tanto se impida a corta do carballo que sobrevive.
Os ecoloxistas mesmo plantexaron a posibilidade de transplantalo, sabedores da dificultade e custo económico da operación.
Nova extraida de www.arredemo.info
