CARACTERÍSTICAS DA EXPOSICIÓN

Contaría cunha representación ampla de artistas plásticos: pintores/as, escultores/as, fotógrafos… e de creadores/as literarios que, conxuntamente, poderían expresar como consideren (resaltando aspectos positivos ou de denuncia), a súa preocupación pola situación do noso medio ambiente.

Tratariamos de que a relación entre artistas plásticos e de creadores literarios estivese equilibrada. Unha proporción adecuada podería ser: 1 plástico / 2 literarios

A exposición sería itinerante, tentando chegar ao máximo número de persoas. En cada lugar onde se presentase faríamos un acto de inauguración expresando o significado desta actividade.

Realizaríase un CATÁLOGO coas seguintes características: cartafol, incluíndo fichas, tamaño cuartilla, nas que figuraría a representación da obra a cor, ou texto literario que a ser posible iría manuscrito polo propio autor/a. Polo envés, estaría a ficha técnica da obra, unha fotografía do autor/a en branco e negro, e o seu curriculum.

O catálogo podería alterarse ao longo de tempo. Variaría o mínimo indispensábel o cartafol e valorariamos a posibilidade de ampliar as fichas das obras, que estarían organizadas por orde de recepción.

A obra dos artistas plásticos sería vendida (sempre que non fose incompatible coa recepción de axudas institucionais) quedando o 30% do prezo para gastos de organización e o 70% para o autor. (No caso de ter que protexer ou enmarcar a obra descontaríanse os gastos da parte que lle correspondese ao autor).

Dos/as creadores/as literarios teriamos unha mostra da súa obra para a venda. Dos artistas pódense ter catálogos da súa obra para que os visualice o público asistente.

O catálogo da exposición venderíase a prezo de custo.

BASES PARA AS OBRAS PLÁSTICAS

Unha obra por autor-a.

Tema: o medio natural galego.

De non ser por forza maior, a obra estará na exposición até que remate o itinerario (aproximadamente ano e medio). Se o autor tivera reproduccións, venderíanse estas, quedando a entregada inicialmente na exposición.

O tamaño será como máximo de 100×100 cm. As esculturas ou instalacións serán tamén dun tamaño facilmente transportable: 100 cm de altura como máximo.

A obra entregariase preparada para ser exposta e transportada (a protección non será con vidro rompible).

Acompañarase dunha ficha (tamaño cuartilla) coa fotografía do/a autor/a (mellor en branco e negro) e curriculum adaptado ao tamaño da ficha.

O prazo máximo de entrega será o 10 de setembro.

BASES PARA AS CREACIÓNS LITERARIAS

Unha obra por autor-a.

Tema: o medio natural galego.

Texto literario orixinal ou xa publicado, coa extensión adecuada para que ocupe como máximo unha cuartilla (medio folio) por unha cara; na outra cara irá a fotografía do/a autor/a (mellor en branco e negro) e curriculum adaptado ao tamaño da ficha.

Obra en poesía ou en prosa (mellor manuscrito).

O prazo máximo de entrega será o 10 de setembro.