Verdegaia demanda unha planificación seria para promover o uso da bicicleta como medio de transporte no Concello de Compostela
O anuncio realizado onte polo Concello relativo ao proxecto de construción dun carril-bici na rúa Berlín en Fontiñas é unha mostra máis da ausencia dunha aposta seria, planificada e estructurada para fomentar o uso cotián da bicicleta na nosa cidade.
O desenvolvemento de infraestruturas para a bicicleta esixe unha ollada global sobre a mobilidade e o urbanismo na cidade para poder realizar unha planificación coherente e con visión de futuro da cidade que queremos contando coa participación activa da cidadanía. Verdegaia esixe ao Concello de Compostela a realización dun Plano Director da Bicicleta en Santiago que recolla as seguintes medidas.
Realización dun estudo sobre a mobilidade en Compostela para coñecer os hábitos da cidadanía e establecer os polos principais de referencia da cidade e os fluxos de transporte.
Deseñar unha rede de itinerarios ciclistas (carrís-bici, sendas-bici, carrís segregados, áreas 30, . . ) que asegure a conectividade entre estes polos de referencia da cidade, procurando itinerarios seguros e de pendentes moderadas.
Dotar de infraestruturas complementarias a rede como aparcadoiros seguros e sinalización axeitada Deseñar programas complementarios de educación vial (para ciclousuarios/as e automobilistas), campañas promocionais e de divulgación e publicacións que recollan indicacións para o uso da bicicleta en Compostela.
Desenvolver normativa urbanística e de construción que faciliten o emprego da bicicleta como a dotación de determinadas prazas de aparcamento para bicicletas por m2 de vivenda de nova construcción en lugares accesibeis da mesma ou a obriga de prever infraestruturas ciclistas en todos os viais de nova construcción e nas reformas se é posíble.
Establecer as partidas orzamentarias precisas nos distintos orzamentos anuais do Concello e un calendario de realización detallado.
Só así poderemos aspirar a establecer a bicicleta como unha ferramenta de transporte normalizada na nosa cidade, situándonos na órbita das cidades avanzadas neste campo como Barcelona, Donostia, Cordoba ou Vitoria. Todo o demáis son xestos inúteis cara a galería que nada aportan no camiño da sustentabilidade para Compostela.
