Proposta aos partidos políticos que concorren ás eleccións municipais de 2007 sobre política municipal e sostenibilidade.
Dúas consideracións móvennos a dar este paso: por unha parte, queremos facer uso dun dereito e dunha ferramenta que consideramos fundamental para unha democracia madura e sana, a participación cidadá; por outra banda, intentar que os principios que defende a nosa asociación (baseados no ecoloxismo social) poidan verse reflectidos nos diferentes programas electorais que se presentarán aos ferroláns e ferrolás nos vindeiros meses.
Tentaremos que as medidas contidas neste documento sexan realistas e realizables dentro do marco de actuación dunha administración municipal, e non puros desexos máis ou menos utópicos; para iso dividiremos, na medida do posible, estas medidas en áreas relacionadas cos diferentes departamentos que existen actualmente no Concello de Ferrol.
Consideramos que as políticas ambientais non deben ser medidas puntuais aplicadas pola presión das asociacións ecoloxistas, senón que debe ser a clase política a que tome conciencia de que existe unha lexislación ambiental municipal, autonómica, estatal e europea que é de obrigado cumprimento tanto para a cidadanía como para as administracións públicas.
Recentes actuacións en materia de infraestruturas, tales como a instalación da Planta de REGANOSA dentro da ría, coa súa ameaza para a poboación, ou a construción do acceso ao mal chamado Porto Exterior destruíndo o emblemático Val de Doniños, poñen en evidencia que os cidadáns e as cidadás de Ferrol e a súa comarca aínda estamos lonxe de acadar un obxectivo necesario: facer comprender á nosa caste política que son eles e elas os máximos responsables da xestión do noso patrimonio ambiental e cultural e da súa conservación para as futuras xeracións de ferroláns e ferrolás.
