A “APDR” transmite os seus parabéns ao movemento veciñal de “OS PRACERES” polo seu recente trunfo xudicial.
Diante da recente sentencia xudicial do Tribunal Supremo, que ven dar a razón ao movemento de oposición ao paso do tren ao porto de Marín pola praza dos Praceres, ao resolver que os pasos a nivel existentes na dita praza incumpren a legalidade vixente, a “Asociación Pola Defensa da Ría”, que desde o principio da loita mantivo unha posición contraria á proposta de trazado do tren pola praza e en defensa dos intereses veciñais, quere expresar o seguinte:
1º.- transmitir os nosos parabéns ao movemento veciñal dos Praceres polo seu trunfo xudicial, un trunfo da loita veciñal que debe seguir animando a todas as persoas que loitan pola defensa dos dereitos colectivos.
2º.- esixir ao tempo que a sentencia sexa executada.3º.- indicar, en calquera caso, que apesares da importancia da resolución xudicial, este trunfo é soamente un trunfo relativo pois, lonxe de supor a desaparición do actual trazado do tren ao porto de Marín, afecta exclusivamente aos pasos a nivel, unha cuestión para a que existen solucións técnicas. En efecto, no caso de se executar a sentencia, os pasos hoxe existentes pasarían a se facer elevados ou soterrados, pero o tren seguiría a invadir unha praza que debera ser para uso exclusivo dos veciños e veciñas da zona.
4º.- mantemos, xunto co movemento veciñal de Os Praceres, a nosa reivindicación de eliminar o paso do tren pola praza, e animamos a toda a sociedade a seguir loitando para que a victoria parcial agora conquerida chegue a se converter na desexada victoria definitiva contra un trazado absurdo, imposto pola forza en contra da posición maioritaria da poboación e só para favorecer os intereses duns poucos.
