Polo futuro do noso mar: REGANOSA fóra da ría
Que ninguén nos supoña en contra do progreso. En ADEGA avogamos sempre pola promoción das enerxías renovábeis e, como paso intermedio, pola progresiva substitución das térmicas de carbón polos ciclos combinados.
Pero a instalación de REGANOSA dentro da ría, resposta só a intereses empresariais, pondo en perigo o dereito á saúde e a un medio ambiente san da cidadanía, alén do medio de vida de numerosas persoas.
A ubicación en Mugardos da regasificadora resposta a un intento de aforrar custos por parte da empresa a costa de que a sociedade asuma un alto risco. Sempre mantivemos que a ubicación menos mala era o porto exterior, e seguimos pensando que esta opción aínda é posíbel.
E por isto que ADEGA chama á poboación de Ferrolterra a opoñerse ao seguinte chanzo que pretende facilitar o trasego de metaneiros pola bocana: a voadura dos baixos na entrada da ría. Este feito constituiría un novo atentado ecolóxico, na xa longa lista de agresións e irregularidades deste caso, polo que hoxe máis que nunca seguimos a exixir unha REGANOSA fóra da ría.
