Como resultado da actividade extractiva formáronse dúas barreiras que, tralo abandono da actividade, foron colonizadas por unha grande cantidade de flora e fauna do espazo protexido. Entre a fauna destacaba a presenza do sapoconcho (Emys orbicularis), especie en perigo de extinción segundo se recolle no Catálogo Galego de Especies Ameazadas (Decreto 88/2007) e de Interese Comunitario segundo a Directiva 92/43 CEE o que obriga a designar Zonas de Especial Conservación e a fornecerlles unha protección estrita.

No ano 1998 unha das barreiras foi aterrada sen aviso previo e con materiais alleos á explotación o que provocou a morte de 13 dos 20 sapoconchos que moraban nela. Dende aquela até agora véñense facendo movementos esporádicos de terra, pensamos que co único fin de evitar a caducidade da concesión, entre outras cousas, para favorecer a reclasificación do SRPEN a Solo Industrial.

Na actualidade a Subdirección Xeral  de Recursos Minerais está a solicitar do concesionario a extracción de áridos sen ter en conta os graves prexuízos ambientais que isto vai ocasionar: graves afeccións a flora e a fauna, mais non so:

a.    Eliminaríase o talude de terra que separa visual e acusticamente o espazo protexido da autovía Porriño-Tui.

b.    Neste talude aniña todas as primaveras e veráns a andoriña das barreiras (Riparia riparia), especie que ten neste lugar a única poboación estival do espazo protexido e unha das poucas da Galiza.

c.    Baixo este talude vive a única poboación por nós coñecida da outrora abondosa planta carnívora chamada papamoscas ou rorella (Drosera rotundifolia). Calquera modificación do terreo provocaría a desaparición desta poboación.

d.    Hai pouco foi visto na barreira un xuvenil de garza imperial (Ardea purpurea) especie catalogada de Interese Especial pola Directiva 79/409/CEE o que é mostra da potencialidade deste lugar.

e.    A barreira e as zonas anexas son utilizadas polo sapoconcho (especie para a que se esixe un Plano de Recuperación dada a súa crítica situación a nível galego) a pesar das alteracións ilegais sufridas na contorna no ano 2004 (construción dun muro de pedra, alongamento dunha pista encol dos hábitats prioritarios da Turbeira do Cerquido e atoamento do rego que comunicaba a barrreira coa turbeira).

f.    Na turbeira citada moran tres plantas en perigo de extinción a nível galego e rexistradas no Libro Vermello da Flora Vascular Ameazada de España.

Convencidos de que a continuación da explotación non reportará beneficio económico nengún e, en troca,  producirá un impacto ambiental crítico e de acordo coa lexislación ambiental vigorante SOLICITAMOS:

A reincorporación dos mesmos e de toda a zona situada entre a Turbeira do Cerquido e a autovía á Rede Natura da que formou parte até o ano 2004.