O Proxecto Ríos é unha iniciativa de Educación e Voluntariado Ambiental promovida por ADEGA. A finalidade deste programa é dar a coñecer o importante papel dos cursos fluviais, amosar as súas problemáticas así como fomentar iniciativas que permitan á cidadania o mantenemento e a mellora dos ríos proporcionanado as ferramentas que garantan a súa participación.

Como novidade nesta campaña de outono en colaboración co Ministerio de Medio Ambiente e dentro do programa de Voluntariado en Ríos da citada entidade, celebrarase durante os tres primeiros fins de semana do mes de outubro un campamento de voluntariado no río Tea. Neste campamento realizarase unha análise e diagnose do estado de saúde dos treitos alto, medio e baixo do Tea empregando a metodoloxía do Proxecto Ríos. O voluntariado terá cubertos os gastos de desprezamento, aloxamento e manutención.

As saídas consisten en realizar roteiros polo río desenvolvendo e explicando a o grupo de participantes do Proxecto Ríos a metodoloxía e partes do programa. Na saída explicaranse de maneira didáctica os pasos a seguir para que o grupo de voluntarios poda logo desenvolver o programa autónomamente.

Cos datos recollidos neste campamento e os que se recollerán ao longo do mes en entrevistas a diferentes axentes sociais da comarca realizarase o Informe do Estado de Saúde do río Tea, informe que se presentará tanto ao Ministerio de Medio Ambiente, á Confederación Hidrográfica do Norte, Conselleria de Medio Ambiente e outras entidades.

O fin de semana do 5 ao 7 de outubro realizamos o primeiro encontro no que percorremos o treito alto do río Tea, visitando as localidades de Maceira e Casteláns. Das inspecións desta primeira quenda podemos apuntar que aínda que o curso alto do Tea e os seus afluentes presenta boas condicións por ser unha zona agreste e pouco humanizada, atoparonse verquidos puntuais e un avance preocupante de especies invasoras, fundamentalmente eucaliptus acacias e ailanto.

Durante esta fin de semana (venres 12 ao domingo 14) os 25 participantes do campamento aloxados no Albergue Alentea (Barcia de Mera) realizarán saídas e inspeccións no curso medio do río Tea, nos arredores das vilas de Ponteareas e Mondariz.