Concentración polo peche de ELNOSA o martes, 30 de outubro, ás 20:30 h
Como consecuencia da entrada en vigor da Directiva 96/61/CE de prevención e control integrados da contaminación e a súa transposición ao ordenamento xurídico do estado español a través da Lei 16/2002, ELNOSA precisa a Autorización Ambiental Integrada (AAI) antes do 30 de outubro de 2007 para poder continuar coa súa actividade.
A Xunta de Galicia arquivou a solicitude da AAI de ELNOSA, polo que a empresa non debería poder seguir con a súa actividade contaminante despois do 30 de outubro: ELNOSA ten que pechar este martes 30 de outubro.
Diante da pasividade que está a amosar a administración, a APDR considera que non se pode dilatar indefinidamente está cuestión, nin por ineptitude nin por complicidade con ELNOSA. Á necesidade de recuperar a ría para a explotación racional do marisqueo, a pesca e o turismo, súmanse razóns legais suficientes: Obriga a lei e esíxeo a maioría.
Ao marxe de consideración legais, a ninguén se lle escapa que non se pode permitir que unha instalación como ELNOSA poida continuar cos seus vertidos á ría e á atmosfera. Sobre todo hai que destacar a contaminación por mercurio, que afecta tanto polas emisións á atmosfera como polos vertidos á ría. Outro tanto pódese dicir da perigosidade do cloro. É intolerable que ELNOSA continúe coa súa actividade nunha zona tan densamente poboada.
A nosa asociación está convencida de que só a mobilización popular poderá ser quen de romper a situación de impasse no que se atopan as administracións responsables. É neste contexto no que convocamos a todos os cidadáns a participar nunha concentración o martes, 30 de outubro, ás 20:30 h do serán na Praza da Peregrina como punto de partida dunha serie de mobilizacións que fagan posible acadar o peche do complexo ENCE-ELNOSA.
